ტელეკომპანიების, პრესისა და ინტერნეტმედიის წარმომადგენლებმა საარჩევნო საკითხებზე ორდღიანი ტრენინგი გაიარეს, რომელსაც უძღვებოდნენ IFES-ის ექსპერტი, ცესკოს სწავლების ცენტრის, იურიდიული დეპარტამენტის და კოორდინაციის, დაგეგმვისა და ანგარიშგების დეპარტამენტის წარმომადგენლები.

მედიის როლი საარჩევნო პროცესში, კენჭისყრის დღე და ფოტო/ვიდეო გადაღების რეგულაციები, არჩევნების გაშუქების ძირითადი სქემები და ამ კუთხით არსებული საერთაშორისო გამოცდილება - ეს ის თემებია, რომლებზეც მედიის წარმომადგენლებს ინფორმაცია სწავლების ცენტრის წარმომადგენელმა მაია გუდაძემ და საარჩევნო სისტემების საერთაშორისო ფონდის ექსპერტმა რუსუდან რუხაძემ მიაწოდეს. ჟურნალისტებმა ინფორმაცია საარჩევნო კანონმდებლობის სიახლეების, ადმინისტრაციული რესურსის გამოყენების და იმ აქტივობების შესახებაც მიიღეს, რომელსაც საარჩევნო ადმინისტრაცია საარჩევნო პროცესში შშმ ამომრჩევლების ჩართულობის ხელშეწყობისა და მათთვის სერვისების გაუმჯობესების მიმართულებით ახორციელებს. გაიმართა დისკუსია.

საარჩევნო ადმინისტრაციამ არაერთი ტრენინგი ჩაატარა მედიის წარმომადგენლებისთვის წინასაარჩევნო პერიოდში, რამაც მოცვა როგორც ცენტრალური, ისე რეგიონული მედია.

ტრენინგი გუდაურში 24-25 სექტემბერს ჩატარდა და ის საარჩევნო ადმინისტრაციამ საარჩევნო სისტემების საერთაშორისო ფონდის (IFES) მხარდაჭერით განახორციელა.