დღეს საქართველოს ცენტრალურ საარჩევნო კომისიასა და საქართველოს შინაგან საქმეთა სამინისტროს შორის ურთიერთგაგების მემორანდუმი გაფორმდა, რომელიც მიზნად ისახავს თანამშრომლობას არჩევნების მშვიდობიან გარემოში ჩატარების ხელშეწყობის მიმართულებით. უსაფრთხო და მშვიდობიანი საარჩევნო გარემო გულისხმობს ისეთი პირობების უზრუნველყოფას, რაც ქმნის ძალადობისა და ზეწოლის გარეშე ამომრჩევლის კონსტიტუციური უფლების რეალიზების შესაძლებლობასა და გარანტიას არჩევნებში ჩართული მხარეების მიერ საქმიანობის სრულყოფილად განსახორციელებლად.
თანამშრომლობის ფარგლებში ცესკოს სწავლების ცენტრმა შეიმუშავა სასწავლო მოდული საუბნო საარჩევნო კომისიის წევრებისთვის, რომელშიც განსაზღვრულია არჩევნების უსაფრთხოების მიზნით ეფექტიანი კომუნიკაციის ფორმები საარჩევნო ადმინისტრაციასა და სამართალდამცავ ორგანოებს შორის, ასევე, კენჭისყრის პროცესის შეუფერხებლად მიმდინარეობის უზრუნველსაყოფად რისკების მართვის საშუალებები და რეაგირების გზები.
სასწავლო მოდული „არჩევნების უსაფრთხოება“ ინტეგრირებულია საუბნო საარჩევნო კომისიის წევრთათვის მე-3 ეტაპზე განსახორციელებელი ტრენინგების პროგრამაში. სასწავლო მოდული ინოვაციურია, რომელიც სწავლების ცენტრმა შეიმუშავა საარჩევნო სისტემების საერთაშორისო ფონდის (IFES) ექსპერტის რეკომენდაციებითა და საერთაშორისო პრაქტიკის გაზიარებით.
