2016 წლის 11 სექტემბრიდან სწავლების ცენტრმა დაიწყო ამომრჩეველთა საინფორმაციო კამპანია, რაც მიზნად ისახავს ელექტორატის საარჩევნო ცნობიერებისა და სამოქალაქო ჩართულობის დონის ამაღლების ხელშეწყობას საქართველოს პარლამენტის 2016 წლის 8 ოქტომბრის არჩევნებისთვის.
საინფორმაციო ხასიათის პროექტი საქართველოს მასშტაბით ხორციელდება და მოიცავს შეხვედრებს ახალგაზრდა ამომრჩევლებთან, ქალებთან, ეთნიკური უმცირესობების წარმომადგენლებსა და შეზღუდული შესაძლებლობების მქონე პირებთან. მონაწილეები ეცნობიან არჩევნების პერიოდში ცესკოსა და სწავლების ცენტრის მიერ ამომრჩევლებისთვის შეთავაზებულ სერვისებს (მათ შორის, სიებში მონაცემების გადამოწმების სერვისი, ეთნიკური უმცირესობების ენებსა და ჯესტურ ენაზე მომზადებული სასწავლო-საინფორმაციო მასალა, ადაპტირებული საარჩევნო უბნები), ასევე, ხმის მიცემის პროცედურების შესახებ პრაქტიკული ცოდნის მიღების მიზნით მონაწლეობას იღებენ იმიტირებულ არჩევნებში.
სწავლების ცენტრი ამომრჩეველთა საინფორმაციო კამპანიას 2016 წლის 17 ივნისს გამოცხადებული საგრანტო კონკურსის ფარგლებში დაფინანსებულ 41 არასამთავრობო ორგანიზაციასთან თანამშრომლობით ახორციელებს. პროექტები 7 ოქტომბრამდე მიმდინარეობს.
