ცენტრალურ საარჩევნო კომისიაში (ცესკო) აღმოსავლეთ პარტნიორობის ქვეყნების არასამთავრობო ორგანიზაციების წარმომადგენლებთან შეხვედრა გაიმართა.
შეხვედრაზე 2016 წლის 8 ოქტომბრის არჩევნებისთვის ცესკოს მიერ უკვე განხორციელებული და დაგეგმილი აქტივობები განიხილეს.
ცესკოს თავმჯდომარის მოადგილე გიორგი შარაბიძემ არასამთავრობო ორგანიზაციების წარმომადგენლებს ამომრჩეველთა განახლებული სიის, რეგისტრირებული საარჩევნო სუბიექტების და სადამკვირვებლო ორგანიზაციების შესახებ მიაწოდა ინფორმაცია. გიორგი შარაბიძემ ასევე ისაუბრა ცესკოს მიერ ინკლუზიური საარჩევნო გარემოს ხელშეწყობის მიზნით განხორციელებული ღონისძიებების შესახებ. შეხვედრის მონაწილეებმა ასევე განიხილეს წინასაარჩევნო გარემო.
არასამთავრობო ორგანიზაციების წარმომადგენლები დღესვე ცესკოს სწავლების ცენტრის ხელმძღვანელობას შეხვდნენ. ცენტრის დირექტორმა ნათია ზაალიშვილმა მათ სწავლების ცენტრის მიერ განხორციელებული საინფორმაციო-საგანმანათლებლო პროგრამები გააცნო.
დღევანდელი შეხვედრა “სამართლიანი არჩევნებისა და დემოკრატიის საერთაშორისო საზოგადოების ინიციატივით გაიმართა. შეხვედრას აღმოსავლეთ პარტნიორობის ქვეყნების: მოლდოვას, აზერბაიჯანის, უკრაინის და სომხეთის არასამთავრობო ორგანიზაციების წარმომადგენლები ესწრებოდნენ.
