საარჩევნო განვითარების სკოლების წარჩინებული კურსდამთავრებულები საოლქო საარჩევნო კომისიებში პრაქტიკას გადიან. საარჩევნო ადმინისტრაციის ინიციატივით 20 კურსდამთავრებული სხვადასხვა საოლქო საარჩევნო კომისიებში დასაქმდნენ და სამი თვის განმავლობაში საარჩევნო პროცესების შესახებ უკვე პრაქტიკულ ცოდნას მიიღებენ.

ახალგაზრდებმა ცესკოში განთავსებული მუდმივმოქმედი გამოფენა დაათვალიერეს, სადაც საქართველოს საარჩევნო ისტორიის უნიკალური ფოტო მასალაა წარმოდგენილი.

სპეციალურად მათთვის გაიმართა ინფორმაციული ხასიათის საორიენტაციო შეხვედრაც; ახალგაზრდები ასევე შეხვდნენ ცესკოს და სწავლების ცენტრის სტრუქტურული ერთეულების ხელმძღვანელებს და უშუალოდ მათგან მიიღეს ინფორმაცია საარჩევნო ადმინისტრაციის საქმიანობების შესახებ.

ცესკოს და სწავლების ცენტრის წარმატებული პროექტი, რომლის ფარგლებშიც ახალგაზრდები საარჩევნო საკითხებზე სასწავლო კურსს გადიან, წელს 20 მუნიციპალიტეტში განხორციელდა და ტრენინგები 453-მა ახალგაზრდამ გაიარა.

ცენტრალური საარჩევნო კომისია გეგმავს, რომ პროექტი გაფართოვდეს და მოიცვას მთელი საქართველო, რაც საარჩევნო ადმინისტრაციის წარმომადგენლებს საშუალებას მისცემს, უფრო მეტ ახალგაზრდას გაუზიარონ საკუთარი პროფესიული გამოცდილება.  

საარჩევნო განვითარების სკოლა ევროპის საბჭოს და საარჩევნო სისტემების საერთაშორისო ფონდის მხარდაჭერით განხორციელდა.