საქართველოს პარლამენტის 2016 წლის 8 ოქტომბრის არჩევნებისთვის შემუშავებული ტრენინგების კონცეფციის შესაბამისად, დაიწყო საარჩევნო ადმინისტრაციის ტრენერთა ტრენინგი, რომლის  ჩატარებასაც უზრუნველყოფენ სწავლების ცენტრის თანამშრომლები.

მონაწილეები სწავლების ცენტრის მიერ შემუშავებული სასწავლო კურსის ფარგლებში ეცნობიან  სხვადასხვა მნიშვნელოვან საკითხს, მათ შორის:

• „ტრენერის გზამკვლევი“ - ტრენერის სახელმძღვანელო პრინციპები და ეთიკის კოდექსი, პრეზენტაციის უნარ-ჩვევები, აუდიტორიის მართვა, დროის მენეჯმენტი, უკუგებისა და ცოდნის შეფასების მექანიზმები;
• საარჩევნო კომისიების წევრთა ტრენინგების კონცეფცია - ტრენინგების სისტემა და ეტაპები, ტრენინგების მეთოდოლოგია, სასწავლო მასალები;
• ტრენინგების ადმინისტრირება;
• საოლქო საარჩევნო კომისიის კომპეტენციას მიკუთვნებული საკითხები;
• საუბნო საარჩევნო კომისიის კომპეტენციას მიკუთვნებული საკითხები;
• კენჭისყრის პროცესი (მათ შორის, შშმ ამომრჩევლების ჩართულობის ხელშეწყობის პოლიტიკა);
• კონფლიქტების მართვა;
• კენჭისყრის დღის განცხადება/საჩივრები.

მოსამზადებელი კურსის გავლის შემდეგ ტრენერები, რომლებიც საარჩევნო ადმინისტრაციის ტრენერთა ბაზიდან და კონკურსის წესით არიან შერჩეულები, საოლქო საარჩევნო კომისიების წევრებთან თანამშრომლობით უზრუნველყოფენ საოლქო და საუბნო საარჩევნო კომისიების წევრებისათვის საარჩევნო კანონმდებლობასთან დაკავშირებული ინტენსიური სასწავლო პროგრამების ჩატარებას.

ცესკოს სწავლების ცენტრი საარჩევნო ადმინისტრაციის ტრენერთა ტრენინგს ახორციელებს საარჩევნო სისტემების საერთაშორისო ფონდის (IFES) მხარდაჭერით, ქ. ყვარელში, სასტუმროში „ყვარლის ედემი“, 13-26 აგვისტოს ჩათვლით პერიოდში.