ცენტრალური საარჩევნო კომისიის (ცესკო) და საარჩევნო სისტემების საერთაშორისო ფონდის (IFES) ორგანიზებით, ცესკოს წარმომადგენლებმა და სწავლების ცენტრის ტრენერებმა გადამზადების კურსი გაიარეს.

ორდღიანი ტრენინგი IFES-ის ექსპერტმა რებეკა ააბერგმა ჩაატარა. კურსი  ისეთ მნიშვნელოვან საკითხებს მოიცავდა, როგორიც არის: არჩევნებთან დაკავშირებული ტერმინოლოგია, არჩევნებში შეზღუდული შესაძლებლობების მქონე პირთა ჩართულობის პრაქტიკული გზამკვლევის მიმოხილვა, შშმ პირთა უფლებები და შესაბამისი ეტიკეტი, სამართლებრივი ჩარჩო: ინკლუზიურობა არჩევნების დღეს, არჩევნების დღის სიმულაცია, საარჩევნო უბანზე შშმ პირთა მიმართ ეტიკეტის და ქცევის ნორმების დაცვა.

ტრენერები, რომელთაც  სასწავლო კურსი გაიარეს, საქართველოს პარლამენტის 2016 წლის 8 ოქტომბრის არჩევნებისთვის ზემოაღნიშნულ საკითხებთან დაკავშირებით საუბნო საარჩევნო კომისიის წევრთა გადამზადებას უზრუნველყოფენ.

ცენტრალურ საარჩევნო კომისიაში ტრენინგი 8-9 აგვისტოს გაიმართა.