მიმდინარე წლის 2 დეკემბერს, 14 საათზე სასტუმრო ”რედისონ ბლუ ივერიაში”, ცენტრალური საარჩევნო კომისიამ, საარჩევნო სისტემების განვითარების, რეფორმებისა და სწავლების ცენტრმა და საქართველოს რეგიონებში აკრედიტებული უმაღლესი საგანმანათლებლო დაწესებულებებმა ხელი მოაწერეს ურთიერთთანამშრომლობის მემორანდუმს. შეხვედრას ესწრებოდნენ ცენტრალური საარჩევნო კომისია, ცენტრის წარმომადგენლები, საქართველოს რეგიონებში აკრედიტებული უმაღლესი საგანმანათლებლო დაწესებულებების რექტორები, იურიდიული ფაკულტეტის დეკანები და ადგილობრივი საერთაშორისო ორგანიზაციების წარმომადგენლები.
მემორანდუმზე ხელმოწერით მხარეები ურთიერთგაგებისა და პატივისცემის პრინციპებით გამოხატავენ ურთიერთთანამშრომლობის სურვილს, რათა ხელი შეუწყონ საქართველოს რეგიონებში აკრედიტებული უმაღლესი საგანმანათლებლო დაწესებულებების სტუდენტების სამოქალაქო ცნობიერების ამაღლებას, პრაქტიკული უნარ-ჩვევების განვითარებასა და თანამედროვე მოთხოვნების შესატყვისი კომპეტენციის მქონე იურისტების მომზადებას საარჩევნო სამართლის დარგში.
რეგიონებში აკრედიტებულ უმაღლეს საგანმანათლებლო დაწესებულებებში, სასწავლო პროგრამას მემორანდუმის ფარგლებში განახორციელებენ ცენტრის წარმომადგენლები. სასწავლო კურსი გათვალისწინებულია იურიდიული ფაკულტეტის მე-3 და მე-4 კურსის სტუდენტებისათვის. წარჩინებული სტუდენტები სტაჟირებას გაივლიან საარჩევნო ადმინისტრაციაში.
