ცესკოს ეგიდით, სწავლების ცენტრის მიერ 2016 წლის 15 მარტსა და 4 აპრილს გამოცხადდა საგრანტო კონკურსი შემდეგ მიმართულებაზე - პოლიტიკური პარტიების საარჩევნო შესაძლებლობების განვითარების ხელშეწყობა 2016 წლის ოქტომბერში გასამართი საქართველოს პარლამენტის არჩევნებისთვის.  

საგრანტო კონკურსის ფარგლებში, საგრანტო საკონკურსო კომისიის გადაწყვეტილებით დაფინანსდა ცხრა არასამთავრობო ორგანიზაცია, რომელებიც ქვეყნის მასშტაბით (73 საარჩევნო ოლქში) უზრუნველყოფენ პოლიტიკური პარტიების წარმომადგენლებისთვის საინფორმაციო-საგანმანათლებლო პროგრამების განხორციელებას, შემდეგ მოდულებზე:

• არჩევნებში ჩართული მხარეები, მათი უფლებამოსილება და საარჩევნო ეთიკა;
• გუნდური მუშაობა, დროის მენეჯმენტი და ანგარიშვალდებულება;
• კონფლიქტების მართვა, საარჩევნო დავები, სტანდარტები და საუკეთესო პრაქტიკა;
• წინასაარჩევნო კამპანია და ადმინისტრაციული რესურსები.

ინოვაციურობის თავალსაზრისით აღსანიშნავია, რომ საგრანტო კონკურსში გამარჯვებულად გამოვლენილ არასამთავრობო ორგანიზაციებთან კოორდინაციის პირობებში, პროექტის განხორციელების პროცესში უზრუნველყოფილი იქნება კონტრიბუცია სწავლების ცენტრის მხრიდან სამიზნე ჯგუფებისათვის შემდეგი მოდულების სწავლების კუთხით:

• საარჩევნო ციკლი და საკანონმდებლო სიახლეები;
• საოლქო და საუბნო საარჩევნო კომისიების საქმიანობა;
• კენჭისყრის დღის პროცედურები. 

სასწავლო კურსს გაივლის 24 პოლიტიკური პარტიის (11 კვალიფიციური და 13 არაკვალიფიციური პოლიტიკური პარტია) 1500-ზე მეტი წარმომადგენელი.

ზემოაღნიშნულის გათვალისწინებით, სწავლების ცენტრმა ტრენერთა მომზადება დაიწყო. მიმდინარე წლის 9 - 10 ივნისს, სწავლების ცენტრში 8 ტრენერი შესაბამის გადამზადებას გაივლის.

ტრენინგების ჩატარების გრაფიკები ეტაპობრივად განთავსდება სწავლების ცენტრის ვებ-გვერდზე.