ცენტრალურმა საარჩევნო კომისიამ და საარჩევნო სისტემების განვითარების, რეფორმებისა და სწავლების ცენტრმა 2015 წლის ანგარიში წარადგინეს. ადგილობრივი არასამთავრობო და საერთაშორისო ორგანიზაციების, პარტიების და მედიის წარმომადგენლები იმ საქმიანობების შესახებ გაეცნენ ინფორმაციას, რომლებიც საარჩევნო ადმინისტრაციამ გასული წლის განმავლობაში განახორციელა. შეხვედრის მონაწილეებს გადაეცათ ორენოვანი (ინგლისური და ქართული) ანგარიში და ანგარიშის აუდიო ვერსია უსინათლოთათვის.

ცესკოს თავმჯდომარემ ანგარიშის წარდგენისას ყურადღება გაამახვილა 2015 წელს სამოქალაქო ცნობიერების ამაღლების და ამომრჩეველთა განათლების მიმართულებით განხორციელებულ პროექტებზე.

როგორც ანგარიშშია აღნიშნული, საქართველოს საარჩევნო ადმინისტრაციის მიერ დეკლარირებული პრინციპების, მიზნებისა და ამოცანების მიღწევის კუთხით 2015 წელი შეიძლება შეფასდეს როგორც ძალიან მნიშვნელოვანი ეტაპი: ეს არის 5 წლიანი განვითარების პირველი წელი, რომელიც ცესკომ და სწავლების ცენტრმა საარჩევნო ადმინისტრაციის 2015 -2019 წლების სტრატეგიული და 2015 წლის სამოქმედო გეგმების მიხედვით განვლო და დაგეგმილი ღონისძიებების უმრავლესობა სრულად და დროულად შეასრულა.

პრეზენტაციის დასრულებისას შეხვედრის მონაწილეებმა საარჩევნო ადმინისტრაციის საქმიანობის შესახებ საკუთარი შეფასებებიც გააკეთეს, კერძოდ აღინიშნა, რომ საარჩევნო პროცესებში ჩართულმა მხარეებმა ერთად უნდა გააგრძელონ საქმიანობა ამომრჩევლების ეფექტური მომსახურების, გამჭვირვალობისა და სანდოობის უზრუნველსაყოფად.

საარჩევნო ადმინისტრაცია აგრძელებს საარჩევნო გარემოს გაუმჯობესებისა და განვითარებისკენ მიმართულ საქმიანობას.