2013  წლის 21 ივნისს, 18 საათზე დასრულდა საარჩევნო ადმინისტრაციის მოხელის სასერტიფიკაციო გამოცდის ჩაბარების მსურველთა რეგისტრაცია, რომლის რაოდენობამ შეადგინა - 8198.

საარჩევნო ადმინისტრაციის მოხელეთა სასერტიფიკაციო გამოცდები ჩატარდება   მიმდინარე წლის 1 ივლისიდან 16 სექტემბრის ჩათვლით.

გამოცდების ჩატარებას უზრუნველყოფს სსიპ საარჩევნო სისტემების განვითარების, რეფორმებისა და სწავლების ცენტრი.

გამოსაცდელი სასერტიფიკაციო გამოცდაზე უნდა გამოცხადდეს სარეგისტრაციო ბარათში მითითებული თარიღისა და დროის დაცვით, თან უნდა იქონიოს საქართველოს მოქალაქის პირადობის დამადასტურებელი მოწმობა ან საქართველოს მოქალაქის პასპორტი.

გამოცდის ჩატარების ხანგრძლივობაა 1 საათი. გამოცდა ჩატარდება ელექტრონული ტესტირების მეთოდით. თითოეული გამოსაცდელისათვის ავტომატურად, შემთხვევითი შერჩევის მეთოდით შეირჩევა 30 საგამოცდო ტესტი. დადებითი შეფასების მისაღებად გამოსაცდელმა  უნდა დააგროვოს 24 ქულა. გამსვლელი ქულის მიღების შემთხვევაში გამოსაცდელს ადგილზე გადაეცემა სერტიფიკატი.

გამოცდის მიმდინარეობაზე დაკვირვების მიზნით დარეგისტრირდა შვიდი  არასამთავრობო  ორგანიზაცია, 63 დამკვირვებლით:

• „დემოკრატიის ქსელი“
• ”მომავლის არჩევანი”
• „ევროპულ დემოკრატიული ცენტრი“
• „სამოქალაქო ინიციატივა-სამართლიანი არჩევნები“
• ”საარჩევნო გარემოს განვითარების ცენტრი”
• „ახალი თაობა დემოკრატიული არჩევნები“
• „დემოკრატიისა და სამართლებრივი განვითარების საზოგადოება“