არჩევნების მთლიანობის უზრუნველსაყოფად მოქმედი სტრატეგიის ფარგლებში, ცესკო და სწავლების ცენტრი ტექნოლოგიური სიახლეების გაცნობის მიმართულებით ჩართულ მხარეებთან საინფორმაციო-სასწავლო პროექტს აგრძელებს.

ღია საკომუნიკაციო პლატფორმის ფორმატში, მორიგი შეხვედრა 2024 წლის 17 სექტემბერს, დისტანციურ ფორმატში გაიმართა. მასში მონაწილეობის მისაღებად სწავლების ცენტრმა საქართველოს პარლამენტის არჩევნებისთვის რეგისტრირებული პოლიტიკური პარტიებისა და ადგილობრივი დამკვირვებელი ორგანიზაციების წარმომადგენლები მოიწვია.

ღონისძიების გახსნით ნაწილში მონაწილეებს ცესკოს თავმჯდომარის მოადგილე გიორგი შარაბიძე და სწავლების ცენტრის დირექტორი ნათია ზაალიშვილი მიესალმნენ. მათ საარჩევნო სიახლეებზე სწორი, ერთგვაროვანი აღქმის ხელშესაწყობად შეთავაზებული საინფორმაციო პროგრამის მნიშვნელობაზე გაამახვილეს ყურადღება, რაც, თავის მხრივ, ემსახურება საარჩევნო ადმინისტრაციასა და ჩართულ მხარეებს შორის პროფესიონალიზმზე დაფუძნებული თანამშრომლობის განმტკიცებას და ერთობლივი ძალისხმევით საერთაშორისო სტანდარტების შესაბამისი არჩევნების ჩატარების უზრუნველყოფას.

საარჩევნო სიახლეებზე ჩართული მხარეების ინფორმირების ამოცანის გათვალისწინებით, სწავლების ცენტრმა შეხვედრის მონაწილეებთან შემდეგი მნიშვნელოვანი საკითხები განიხილა: ელექტრონული აპარატების გამოყენებით არჩევნების ჩატარების საერთაშორისო სტანდარტები; ტექნოლოგიური სიახლეები და კენჭისყრის პროცესის მიმდინარეობის პრაქტიკული ასპექტები; ამომრჩევლის ნების თავისუფალი გამოვლენის გარანტირებულობა; არჩევანის ფარულობის და საარჩევნო უბანზე ამომრჩევლის პერსონალური მონაცემების დაცვა; ინკლუზიური საარჩევნო გარემო და შესაბამისი მექანიზმები; კენჭისყრის შენობაში ყოფნის უფლების მქონე პირების უფლებრივი მდგომარეობა; 2024 წლის 26 ოქტომბრის არჩევნებისთვის ამომრჩევლებისა და ჩართული მხარეებისთვის დანერგილი სერვისები.

შეხვედრაში მონაწილეობა 123-მა პირმა მიიღო, მათ შორის, 11 პოლიტიკური პარტიის 86-მა წარმომადგენელმა და 8 ადგილობრივი დამკვირვებელი ორგანიზაციის 37-მა წარმომადგენელმა. დისტანციურ შეხვედრას ეუთოს/ოდირის საერთაშორისო სადამკვირვებლო მისიის წარმომადგენლები დაესწრნენ.

მნიშვნელოვანია, რომ 17 სექტემბერს გამართული ღონისძიება ჩართული მხარეების განგრძობითი ინფორმირების პროგრამის შემადგენელი ნაწილია. წინარე პერიოდში, 6 სექტემბერს, ცესკოს და სწავლების ცენტრის მიერ გადამზადებულმა ტრენერებმა, ყველა მუნიციპალიტეტში, პირისპირ ფორმატში, საარჩევნო ელექტრონული აპარატების მუშაობის დემონსტრირების თანხლებით, ჩაატარეს სასწავლო-საინფორმაციო შეხვედრები, რომელშიც მონაწილეობა პოლიტიკური პარტიების 597-მა წარმომადგენელმა და ადგილობრივი დამკვირვებელი ორგანიზაციების 277-მა წარმომადგენელმა მიიღო.