14-16 თებერვალი საქართველოს არჩევნების ისტორიის გამორჩეული თარიღია. 105 წლის წინ, 1919 წლის 14 - 16 თებერვალს დამოუკიდებელი საქართველოს ისტორიაში პირველი მრავალპარტიული, დემოკრატიული არჩევნები ჩატარდა.

აღნიშნულ არჩევნებს ორგანიზება გაუწია დამოუკიდებელი საქართველოს დემოკრატიული რესპუბლიკის დამფუძნებელი კრების ცენტრალურმა საპარლამენტო საარჩევნო კომისიამ ალექსანდრე ლომთათიძის ხელმძღვანელობით.

პირველი მრავალპარტიული დემოკრატიული არჩევნების ჩატარების თარიღთან დაკავშირებით, ცენტრალური საარჩევნო კომისიის (ცესკო) თავმჯდომარემ, მისმა მოადგილემ, ცესკოს  წევრებმა, საარჩევნო ადმინისტრაციის სტრუქტურული ერთეულების ხელმძღვანელებმა და სწავლების ცენტრის დირექტორმა პატივი მიაგეს ალექსანდრე ლომთათიძის ხსოვნას. მათ დიდუბის პანთეონში მისი საფლავი ყვავილებით შეამკეს.

როგორც ცესკოს თავმჯდომარე გიორგი კალანდარიშვილმა აღნიშნა, „დიდია ალექსანდრე ლომთათიძის და მაშინდელი ცესკოს სხვა წევრების წვლილი საქართველოში საარჩევნო კულტურის განვითარების თვალსაზრისით. დღეს ჩვენ ბატონი ალექსანდრე ლომთათიძის ხსოვნას მივაგეთ პატივი და ამით სწორედ მის განსაკუთრებულ ღვაწლს გვინდა გავუსვათ ხაზი. ჩვენ შეგვიძლია თამამად ვთქვათ, რომ მისი ხელმძღვანელობით ჩატარებული დამფუძნებელი კრების არჩევნები  საქართველოს დემოკრატიული საზოგადოების ფორმირებისკენ გადადგმული მნიშვნელოვანი ნაბიჯი იყო.“

დამფუძნებელი კრების არჩევნები გამორჩეული იყო საყოველთაობის მაღალი ხარისხით - საქართველოს საარჩევნო კანონმდებლობა ხმის მიცემის უფლებას აძლევდა 20 წლის ასაკიდან ყველა მოქალაქეს, სქესისა და წარმომავლობის განურჩევლად; საქართველოს დამფუძნებელ კრებაში აირჩიეს 5 ქალი, მაშინ როდესაც იმდროინდელი მსოფლიოს სახელმწიფოთა უმრავლესობაში ქალებს ხმის მიცემის უფლება არ ჰქონდათ; არჩევნებში ხმის მიცემისა და დეპუტატად არჩევის საშუალება მიეცათ საქართველოში მცხოვრები ეთნიკური უმცირესობების წარმომადგენლებს.  სულ არჩევნებში მონაწილეობა 15-მა საარჩევნო სუბიექტმა მიიღო. ამ არჩევნებით ჩვენმა ქვეყანამ შეძლო და საფუძველი ჩაუყარა საარჩევნო კულტურას, რომლის განვითარებასა და გაძლიერებას დღესაც დიდი მნიშვნელობა ენიჭება.