საქართველოს ცენტრალურმა საარჩევნო კომისიამ (ცესკო) და სსიპ საარჩევნო სისტემების განვითარების რეფორმებისა და სწავლების ცენტრმა (სწავლების ცენტრი), საქართველოს განათლებისა და მეცნიერების სამინისტროსთან თანამშრომლობით, 2023 წლის 26 ოქტომბრიდან 6 ნოემბრის ჩათვლით პერიოდში საჯარო სკოლებში საინფორმაციო-სასწავლო პროგრამა „არჩევნები და ახალგაზრდა ამომრჩეველი“ განახორციელა. პროექტმა 64 მუნიციპალიტეტში განლაგებული 315 საჯარო სკოლა მოიცვა.

ახალგაზრდების ინფორმირებულ ამომრჩევლებად ჩამოყალიბების კომპლექსური ამოცანის შესაბამისად განახლდა სასწავლო პროგრამა. სხვადასხვა საარჩევნო საკითხის განხილვისას, XI-XII კლასის მოსწავლეებმა მიიღეს ინფორმაცია არჩევნების მოდერნიზაციის შესახებ, კენჭისყრის პროცესის ელექტრონული აპარატებით ჩატარების სიახლეებზე და ამომრჩევლებისთვის დანერგილი საარჩევნო სერვისების თაობაზე, ასევე განიხილეს ამომრჩეველთა ვერიფიკაციისა და ხმის დათვლის სპეციალური ელექტრონული აპარატების გამოყენების წესი და ამ მიმართულებით არსებული საერთაშორისო პრაქტიკა.

თეორიულ საკითხებთან ერთად მოსწავლეებმა პრაქტიკული სწავლებაც გაიარეს. გაიმართა ხმის მიცემის იმიტირებული პროცესები, რაც უზრუნველყოფს ახალგაზრდებში მოტივაციის გაძლიერებას უფრო მეტად დაინტერესდნენ საარჩევნო პროცესებით და გახდნენ აქტიური მონაწილეები.

მოსწავლეებმა სასწავლო კურსი პოზიტიურად შეაფასეს. უკუგების ფორმატში მათ აღნიშნეს, რომ პროგრამა დაეხმარათ ზედმიწევნით გასცნობოდნენ ტექნოლოგიურ სიახლეებს საარჩევნო პროცესში, და რაც მთავარია, ნათლად დაინახეს თითოეული ამომრჩევლის როლის მნიშვნელობა როგორც არჩევნებში, ისე ზოგადად სახელმწიფოს დემოკრატიულად განვითარების პროცესში.

2023 წელს განხორციელებული სასწავლო პროგრამა გაიარა 315 საჯარო სკოლის 6597 მოსწავლემ (ქალი-3951; კაცი-2646), მათ შორის, ეთნიკური უმცირესობებით კომპაქტურად დასახლებულ მუნიციპალიტეტებში (თელავი, ლაგოდეხი, საგარეჯო, გარდაბანი, რუსთავი, მარნეული, ბოლნისი, დმანისი, თეთრიწყარო, წალკა, ახალციხე, ახალქალაქი, ნინოწმინდა) განლაგებული 45 საჯარო სკოლის 893 მოსწავლემ (ქალი-552; კაცი- 341).

პროექტი 2015 წლიდან ხორციელდება და ახალგაზრდების საარჩევნო ცნობიერების ამაღლებას, სამოქალაქო პასუხისმგებლობის ზრდის ხელშეწყობას ისახავს მიზნად. დღემდე საინფორმაციო-სასწავლო პროგრამა 64 მუნიციპალიტეტში განლაგებული 1353 საჯარო სკოლის XI-XII კლასის 26000-მდე მოსწავლემ გაიარა. 

ცესკო და სწავლების ცენტრი გულითად მადლობას უხდის საქართველოს განათლებისა და მეცნიერების სამინისტროს, საგანმანათლებლო რესურსცენტრებს, საჯარო სკოლების დირექციასა და მოსწავლეებს პროექტის წარმატებით განხორციელებისთვის.