ცესკო და სწავლების ცენტრი საქართველოს უმაღლეს საგანმანათლებლო დაწესებულებებთან  აქტიურ თანამშრომლობას აგრძელებს.

უნივერსიტეტებთან პარტნიორობის ფარგლებში სწავლების ცენტრი ყოველწლიურად, გაზაფხულისა და შემოდგომის სემესტრში, ახორციელებს საავტორო პროგრამას საარჩევნო სამართლის დარგში.

2010 წლიდან გაფორმებულ მემორანდუმს მიმდინარე წელს კიდევ ერთი უნივერსიტეტი შემოუერთდა და ამჟამად, ცესკო და სწავლების ცენტრი აქტიურად თანამშრომლობს თბილისსა და რეგიონებში მოქმედ 16 უნივერსიტეტთან.

ამ ეტაპისთვის 2021-2022 სასწავლო წლის გაზაფხულის სემესტრული სწავლება იურიდიული, სოციალური მეცნიერებების და ჟურნალისტიკის ფაკულტეტების საბაკალავრო პროგრამის სტუდენტებისთვის ცხრა უნივერსიტეტში დაიგეგმა: კავკასიის საერთაშორისო უნივერსიტეტი; ილიას სახელმწიფო უნივერსიტეტი; აღმოსავლეთ ევროპის უნივერსიტეტი; ალტე უნივერსიტეტი; გრიგოლ რობაქიძის სახელობის უნივერსიტეტი; გორის სახელმწიფო სასწავლო უნივერსიტეტი; იაკობ გოგებაშვილის სახელობის თელავის სახელმწიფო უნივერსიტეტი; სამცხე-ჯავახეთის სახელმწიფო უნივერსიტეტი; აკაკი წერეთლის ქუთაისის სახელმწიფო უნივერსიტეტი.

უნივერსიტეტებში საარჩევნო სამართლის საავტორო პროგრამას სწავლების ცენტრის მიერ გადამზადებული ლექტორები განახორციელებენ. პროგრამა თანამედროვე სწავლების სტრატეგიას ეფუძნება - დიდი ყურადღება ეთმობა სტუდენტების როგორც თეორიული ცოდნის, ისე პრაქტიკაში პროფესიული უნარ-ჩვევების დახვეწას. ამ მიზნით, ფაკულტეტების გათვალისწინებით, სტუდენტების მონაწილეობით ეწყობა იმიტირებული სასამართლო პროცესები, საარჩევნო დებატ-კლუბები და კონკურსები არჩევნების პოპულარიზაციის თემატიკაზე.

პროგრამის მონაწილე სტუდენტები დეტალურად ეცნობიან არჩევნებთან დაკავშირებულ საკითხებს, საკანონმდებლო სიახლეებსა და საარჩევნო ადმინისტრაციის მიერ დანერგილ სერვისებს. ამ მიმართებით, სასწავლო კურსის ფარგლებში გათვალისწინებულია ასევე სტუდენტებთან საარჩევნო ადმინისტრაციის მაღალი რანგის წარმომადგენელთა შეხვედრების ორგანიზება.

ეფექტიან სასწავლო შედეგზე ორიენტირებით, სწავლების ცენტრის მიერ სტუდენტებისთვის შემუშავებული დამხმარე სახელმძღვანელო და პრაქტიკული სავარჯიშოების კრებული ქმნის მნიშვნელოვან სასარგებლო რესურსს; სტუდენტებისგან მიღებული უკუგების მიხედვით, აღნიშნული რესურსი ამარტივებს საარჩევნო კოდექსში გადმოცემული კომპლექსური საკითხების გააზრებას და ამასთან, ხელს უწყობს ცოდნის გამდიდრებას საერთაშორისო პრაქტიკის შესწავლით.

სასწავლო პროგრამა ეხმიანება საარჩევნო ადმინისტრაციის საქმიანობის სტრატეგიულ პრიორიტეტს და მიზნად ისახავს ახალგაზრდებში საარჩევნო კულტურის განმტკიცებასა და თანამედროვე მოთხოვნების შესატყვისი კომპეტენციის მქონე დარგობრივი სპეციალისტების მომზადებას საარჩევნო სამართლის დარგში.