ცენტრალურ საარჩევნო კომისიაში გამართულ შეხვედრაზე დღეს ადგილობრივი არასამთავრობო და საერთაშორისო ორგანიზაციების წარმომადგენლებს ელექტრონული ხმის დათვლის საპილოტე პროექტი გააცნეს. აღნიშნული პროექტის განხორციელება 2018 წლის 13 მაისის საკრებულოს შუალედურ არჩევნებზე იგეგმება და კვლევისა და უშუალოდ პროცესზე დაკვირვების მიზნით ხორციელდება. როგორც შეხვედრაზე აღინიშნა, ოფიციალური შედეგების დასათვლელად, ასევე განხორციელდება საარჩევნო კანონმდებლობით დადგენილი ხმის დათვლის პროცედურები. საარჩევნო ადმინისტრაციას, აღნიშნული საპილოტე პროექტის განხორციელებით იმის დადგენა სურს თუ რამდენად მისაღებია ქართველი ამომრჩევლისა და ჩართული მხარეებისთვის ახალი ტექნოლოგიები. საპილოტე პროექტის განხორციელებით საარჩევნო ადმინისტრაცია საქართველოს საარჩევნო პროცესში წარმატებული საარჩევნო ტექნოლოგიების დანერგვის შესაძლებლობას განიხილავს.

დღევანდელი შეხვედრის მონაწილეებს ხმის დათვლის ტექნოლოგია და პროექტის მიზნები უშუალოდ ცესკოს თავმჯდომარე თამარ ჟვანიამ გააცნო. მან დეტალურად ისაუბრა თითოეული პროცედურის შესახებ, რის შემდეგაც დამკვირვებელი ორგანიზაციების წარმომადგენლებს საშუალება მიეცათ ელექტრონული ხმის დათვლის აპარატის მუშაობა პრაქტიკაში შეემოწმებინათ. ცესკოში გამართულ შეხვედრას დღეს ცესკოს წევრები, სტრუქტურული ერთეულების ხელმძღვანელი პირები და სწავლების ცენტრის დირექტორი ესწრებოდნენ.

საარჩევნო ადმინისტრაციას, გარდამავალ პერიოდში მიეცა უფლებამოსილება საქართველოს პარლამენტის არჩევნებამდე განეხორციელებინა ქმედებები საარჩევნო პროცესში ელექტრონული ტექნოლოგიების გამოყენების შესაძლებლობის საკითხებში (საარჩევნო კოდექსის 18516 მუხლის თანახმად) და აქედან გამომდინარე ცესკოს შესაბამისმა დეპარტამენტებმა და სწავლების ცენტრმა საპილოტე პროექტის განხორციელების მიზნით შესაბამისი პროცედურებიც შეიმუშავეს.

საპილოტე პროექტს უკვე გაეცნენ პოლიტიკური პარტიების წარმომადგენლები, რომლებიც 13 მაისის საკრებულოს შუალედურ არჩევნებში მიიღებენ მონაწილეობას.

ელექტრონული ხმის დათვლის საპილოტე პროექტი საარჩევნო ტექნოლოგიებზე ორიენტირებულ, კანადურ საერთაშორისო არასამთავრობო ორგანიზაცია „DELIAN“- თან თანამშრომლობით და კანადის მთავრობის ფინანსური ხელშეწყობით ხორციელდება.