ცესკოს სწავლების ცენტრი 73-ვე საოლქო საარჩევნო კომისიასთან საინფორმაციო შეხვედრებს მართავს, რომელშიც მონაწილეობას საარჩევნო კომისიების სრული შემადგენლობა მიიღებს.

შეხვედრის მიზანია მუნიციპალიტეტის ორგანოთა 2 ოქტომბრის არჩევნებისთვის საოლქო საარჩევნო კომისიების ინსტიტუციური შესაძლებლობების გაძლიერების ხელშეწყობა, საარჩევნო ოპერაციების ეფექტიანად მართვის უზრუნველსაყოფად.

ღონისძიება ცესკოს თავმჯდომარემ გიორგი კალანდარიშვილმა და სწავლების ცენტრის დირექტორმა ნათია ზაალიშვილმა გახსნეს. მათ ყურადღება გაამახვილეს, რომ არჩევნებისთვის საქმიანობის მაღალი სტანდარტით განსახორციელებლად მნიშვნელოვანია საკანონმდებლო რეგულაციების აღსრულების მიზნით ერთგვაროვანი პრაქტიკის განმტკიცება და საოლქო საარჩევნო კომისიების წევრების გუნდურად, კონსტრუქციულად მუშაობა.

73 საოლქო საარჩევნო კომისიის  1241 წევრისგან დაკომპლექტებულ 18 ჯგუფთან საინფორმაციო შეხვედრები, 1-5 სექტემბრის პერიოდში, დისტანციურ ფორმატში წარიმართება.

მონაწილეები დეტალურად ეცნობიან შემდეგ ძირითად საკითხებს: საოლქო საარჩევნო კომისიის მანადატი, უფლებამოსილებების მიმოხილვა და პროფესიული ეთიკა; საოლქო საარჩევნო კომისიის ჩართულობა და შეზღუდვები წინასაარჩევნო აგიტაციაში/კამპანიაში; ამომრჩეველთა სიების შედგენა, გამოქვეყნება და მონაცემთა გადამოწმება; საუბნო საარჩევნო კომისიებთან კოორდინაცია/კომუნიკაცია; კენჭისყრის დღის პროცედურები და ეპიდემიოლოგიური პროტოკოლი; კენჭისყრის დასრულების შემდგომ საუბნო საარჩევნო კომისიიდან დოკუმენტაციის მიღება/დახარისხება; საუბნო საარჩევნო კომისიის კენჭისყრის შედეგების გადამოწმება/ხელახლა დათვლა; საოლქო საარჩევნო კომისიის მიერ კენჭისყრისა და არჩევნების შედეგების შეჯამება.

ინკლუზიური საარჩევნო გარემოს უზრუნველსაყოფად, შეხვედრის ფარგლებში საოლქო საარჩევნო კომისიების წევრებს ასევე მიეწოდებათ ინფორმაცია შეზღუდული შესაძლებლობის მქონე ამომრჩევლებისთვის, კენჭისყრაში მონაწილეობის ხელშეწყობის მიზნით, განსახორციელებელი სერვისების შესახებ.