ამომრჩეველთა საინფორმაციო კამპანია პროექტის “ინფორმირებული ახალგაზრდა ამომრჩეველი“ ფარგლებში
2016 წლის საქართველოს პარლამენტის არჩევნების მეორე ტურისთვის ახალგაზრდა ამომრჩეველთა აქტივობის ზრდის ხელშეწყობის მიზნით, სწავლების ცენტრმა პარტნიორ უმაღლეს საგანმანათლებლო დაწესებულებებში პროექტი „ინფორმირებული ახალგაზრდა ამომრჩეველი“ დაიწყო.
22 ოქტომბერს სულხან-საბა ორბელიანის სასწავლო უნივერსიტეტში, გორის სახელმწიფო სასწავლო უნივერსიტეტში და ქუთაისის აკაკი წერეთლის სახელობის სახელმწიფო უნივერსიტეტში ერთ საათიანი ტრენინგ-სემინარები გაიმართა.
ტრენინგ-სემინარები 24-28 ოქტომბრის პერიოდში ეტაპობრივად ჩატარდება:
- სამცხე-ჯავახეთის სახელმწიფო სასწავლო უნივერსიტეტში
- თელავის იაკობ გოგებაშვილის სახელობის სახელმწიფო უნივერსიტეტში
- ბათუმის შოთა რუსთაველის სახელმწიფო უნივერსიტეტში
- ილიას სახელმწიფო უნივერსიტეტში
- სოხუმის სახელმწიფო უნივერსიტეტში
- კავკასიის საერთაშორისო უნივერსიტეტში
- აღმოსავლეთ ევროპის სასწავლო უნივერსიტეტში
- გრიგოლ რობაქიძის სახელობის უნივერსიტეტში
- ივ. ჯავახიშვილის სახელობის თბილისის სახელმწიფო უნივერსიტეტში.
პროექტი „ინფორმირებული ახალგაზრდა ამომრჩეველი“ მიზნად ისახავს ახალგაზრდებში არჩევნების თემის პოპულარიზებას, მათი სამოქალაქო ცნობიერების ამაღლების ხელშეწყობასა და ინფორმირებას საარჩევნო უფლებების სრულყოფილად რეალიზების თაობაზე, რაც, თავის მხრივ, ითვალისწინებს არჩევნებში ახალგაზრდა ამომრჩევლების აქტიური ჩართულობის ზრდის ხელშეწყობას.
