ცენტრალური საარჩევნო კომისია (ცესკო) და საარჩევნო სისტემების განვითარების, რეფორმებისა და სწავლების ცენტრი (სწავლების ცენტრი) საქართველოს უმაღლეს საგანმანათლებლო დაწესებულებებთან აქტიურ თანამშრომლობას აგრძელებს. უნივერსიტეტებთან პარტნიორობის ფარგლებში სწავლების ცენტრი ყოველწლიურად, გაზაფხულისა და შემოდგომის სემესტრში, ახორციელებს საავტორო პროგრამას საარჩევნო სამართლის დარგში.

პროგრამა თანამედროვე სწავლების სტრატეგიას ეფუძნება - დიდი ყურადღება ეთმობა სტუდენტების როგორც თეორიული ცოდნის, ისე პრაქტიკაში პროფესიული უნარ-ჩვევების დახვეწას. იურიდიული, სოციალურ მეცნიერებათა და ჟურნალისტიკის ფაკულტეტის საბაკალავრო პროგრამის სტუდენტები დეტალურად გაეცნობიან არჩევნებთან დაკავშირებულ საკითხებს, საკანონმდებლო სიახლეებსა და საერთაშორისო საარჩევნო პრაქტიკას. ახალგაზრდები ასევე მიიღებენ ინფორმაციას საარჩევნო ადმინისტრაციის მიერ შეთავაზებული საარჩევნო სერვისების და იმ ტექნოლოგიური ინოვაციების შესახებ, რომლებიც ბოლო პერიოდში საარჩევნო პროცესში პილოტის სახით ხორციელდება.

უნივერსიტეტებში გაზაფხულის სემესტრული სწავლების ჩატარებას სწავლების ცენტრის მიერ გადამზადებული ლექტორები უზრუნველყოფენ. სასწავლო პროგრამა ეხმიანება საარჩევნო ადმინისტრაციის საქმიანობის სტრატეგიულ პრიორიტეტს და მიზნად ისახავს ახალგაზრდებში საარჩევნო კულტურის განმტკიცებასა და თანამედროვე მოთხოვნების შესატყვისი კომპეტენციის მქონე დარგობრივი სპეციალისტების მომზადებას.

2022 – 2023 წლის შემოდგომის სემესტრული სწავლება იურიდიული, სოციალურ მეცნიერებათა და ჟურნალისტიკის ფაკულტეტების საბაკალავრო პროგრამის სტუდენტებისთვის გორის სახელმწიფო სასწავლო უნივერსიტეტსა და გურამ თავართქილაძის თბილისის სასწავლო უნივერსიტეტში განხორციელდა, მასში მონაწილეობა 46 სტუდენტმა მიიღო, ხოლო იურიდიული კლინიკის ფორმატში პროგრამა ალტე უნივერსიტეტისა და ილიას სახელმწიფო უნივერსიტეტის იურიდიული ფაკულტეტის/სამართლის სკოლის საბაკალავრო და მაგისტრატურის საფეხურების 145 სტუდენტმა გაიარა.

ცესკო და სწავლების ცენტრი 2010 წლიდან აქტიურად თანამშრომლობს თბილისსა და რეგიონებში მოქმედ უნივერსიტეტებთან. დღემდე, სასწავლო კურსი პარტნიორი უნივერსიტეტების 7200-მდე სტუდენტმა გაიარა.